א      הַלְלוּ-יָהּ:     אַשְׁרֵי-אִישׁ, יָרֵא אֶת-יְהוָה;     בְּמִצְוֺתָיו, חָפֵץ מְאֹד. 

ב      גִּבּוֹר בָּאָרֶץ, יִהְיֶה זַרְעוֹ;     דּוֹר יְשָׁרִים יְבֹרָךְ.

ג      הוֹן-וָעֹשֶׁר בְּבֵיתוֹ;     וְצִדְקָתוֹ, עֹמֶדֶת לָעַד.

ד      זָרַח בַּחֹשֶׁךְ אוֹר, לַיְשָׁרִים;     חַנּוּן וְרַחוּם וְצַדִּיק.

ה      טוֹב-אִישׁ, חוֹנֵן וּמַלְוֶה;     יְכַלְכֵּל דְּבָרָיו בְּמִשְׁפָּט.

ו      כִּי-לְעוֹלָם לֹא-יִמּוֹט;     לְזֵכֶר עוֹלָם, יִהְיֶה צַדִּיק.

ז      מִשְּׁמוּעָה רָעָה, לֹא יִירָא;     נָכוֹן לִבּוֹ, בָּטֻחַ בַּיהוָה.

ח      סָמוּךְ לִבּוֹ, לֹא יִירָא;     עַד אֲשֶׁר-יִרְאֶה בְצָרָיו.

ט      פִּזַּר, נָתַן לָאֶבְיוֹנִים-- צִדְקָתוֹ, עֹמֶדֶת לָעַד;     קַרְנוֹ, תָּרוּם בְּכָבוֹד. 

י      רָשָׁע יִרְאֶה, וְכָעָס-- שִׁנָּיו יַחֲרֹק וְנָמָס;     תַּאֲוַת רְשָׁעִים תֹּאבֵד.